Ирмос: Неизреченным велением пешеходца приял еси и непроходимое море изсушил еси, израильтеския люди, обращенныя от Египта, спасл еси, исходную песнь пою Тебе, Господи.
Припев: Премудросте Божия, Софие преименитая, спаси ны, грешныя рабы Твоя.
Аз Премудрость вселих, рече приточник от лица Господня, Мой совет и утверждение, еже есть Единородный Сын и Слово Божие. Аз, рече, любящия Мя люблю, а взыскающии Мене обрящут благодать.
Бог Премудростию Своею землю основа, уготова же Небеса мудростию, положи облак во одеяние, и составив свет утренний, вратницы же адовы, Той видевше, убояшася.
Слава: Всем сердцем взыщем Премудрость Божию, от Пречистыя Девы в плоть пришедшую, да не поткнутся ноги наша, и не убоимся страшнаго, нашедшаго на ны, устремления нечестивых.
И ныне: Достойно, яко одушевленное Тя Небо, пришла Небесная, Пречистая, Божественная селения, и предста, светло украшена, яко Невеста Всенепорочная, Царю и Богу.
Ирмос: Утверждаяй гром и созидаяй дух, утверди мене, Господи, да Тя пою истинно и творю волю Твою, яко несть свят, яко Ты, Боже наш.
Господь будет на всех путех наших, и утвердит ноги наша, да не поткнемся, аще стяжем Премудрость Его, и обымет нас и даст главам нашим венец благословен.
Дар благ дает нам София, Премудрость Божия, и путем правым тещи наставляет нас, аще течем путем тем, не запнемся и сохраняем себе в живот вечный.
Слава: Егда же уныем, да взыщем Премудрость Божию, Софию именуемую, и даст нам веселие и радость, и сохранит нас от всякия неприязни, и покажет нам путь животный.
И ныне: Лик богословов от конец, свыше же Ангел множества к Сиону идяху всесильным мановением, достодолжно, Владычице, Твоему погребению служаще, и вкупе ликующе, и надгробную песнь поюще: радуйся, Невесто Приснодевая.
Премудрость Божия светозарно сияет чудесными зарями, веселия исполняя приходящих с верою и болезни душевныя и телесныя нам исцеляя, мы же, взирающе на огнезрачное Тоя воображение, покланяемся, глаголюще: спаси рабы Своя, Содетелю всяческим, от напастных обстояний, молитвами Пречистыя Твоея Матере.
Ирмос: Услышах Твое, Христе, воистинну преславное, яко безсмертен сый Бог, уподобися смертным человеком и пребысть, еже бе, и того ради Твою славлю силу.
Жены некия Премудрость Божию взыскаша и вослед Тоя идоша, блудницы же целомудренны быша, и тьму во свет претвориша, и мучителей посрамиша, и живот вечный наследоваша.
Зело любима есть Премудрость Божия, еже есть смотрения таинство всем человеком, Ейже ничтоже точно есть под небесем, да сохраняем Ту, яко зеницу ока, и упокоит нас в день Судный.
Слава: Иже неизреченною мудростию словом составивый всяческая Бог, еяже по смотрению Софию именова, да проповемы Ту на краех высоких и Тоя ради обрящем благодать и милость в день Судный.
И ныне: В преставлении Твоем, Мати Божия, пространнейшее тело Твое и богоприятное ангельская воинства священными крилы трепетом и радостию покрываху и сице вопияху: радуйся, Невесто Неневестная.
Ирмос: Ревность приимет люди ненаказанныя, законопреступныя евреи,н огнь пояст супостаты Твоя, яко Тя, Распятаго, лестца именоваша.
Концы вселенныя, и вся, яже на ней, и небо небесем Премудрость основа, Та бо всех нас созда, Тою царие царствуют, и сильнии держат землю, и мудрии пишут правду.
Людие земнии, почтите Премудрость Божию, Софию именуемую, да во веки царствуете и живи будете, Сия бо нам исправляет путь спасения, не чтящии же Тоя во дне ада обретаются.
Слава: Мерило лестно - мерзость пред Господем, Премудрости рачитель глаголет, мерило же праведное приятно Ему есть, уста же благочестивых поучатся Премудрости.
И ныне: Сосуд подобаше избранный, пением Ти весь удивляемь, Девице, исходен, весь освящен Богови, всем богоприятен, и сей истинно являемый, Богородице Всепетая.
Ирмос: Пучиною житейскою деяньми моими снидох во ад,но, яко от кита Иона, тако вопию: из глубины зол возведи, молюся, Сыне Божий и Слове.
Начаток Премудрости - стяжати веру несумненную, да тою наследим благая; не дадим сна очима и взыщем Премудрость Божию, не уклонимся ни на десно, ни на шуее, да спасемся, аки серна от тенет.
Очи наша да зрят к Премудрости Божия Матере, в Нюже неизреченно Бог Слово вселися и, от Тоя плоть заимовав, недомысленно родися; днесь апостольский лик Тоя погребению по воздуху стекается, исходную песнь поюще: благословен из Тебе рождейся Бог наш.
Слава: Почтим, людие, Премудрость Божию, Софию именуемую, да обымет нас, пленицу грехов наших разрушит и даст главам нашим венец, и тою, яко любодельная пчела, потщимся и славими всеми будем.
И ныне: Жизни бывши храм, жизнь присносущную улучила еси, смертию бо к животу преминула еси, Иже Жизнь рождали воипостасную, тем вопием Ти: из глубины зол возведи ны, молимтися, Владычице Всепетая.
Притецем, православнии людие, к Премудрости Божии и видим чудотворную икону Пречистыя Богоматере, Юже именуем по явлению Софию, Премудрость Божию, зане храм бысть одушевлен Единороднаго Сына и Слова Божия. Сии убо светолучно сияет в пречестнем храме Своем и сердца наша веселит, приходящих с верою и взирающих со страхом и благоговением на пречистую сию икону, помышляюще в сердцах наших, яко воистинну Премудрости Божии есть селение и таинства Его смотрение, на упование бо верным воображение огнезрачное Ея зрим и покланяемся, яко истинному и пренепорочному Ея девству в рождестве и по рождестве паки; от Неяже изыде Огнь Божественный, попаляя тленныя страсти и просвещая души наша и чисты сотворяя, Имже и веки сотвори Отец, Той же и Мудрость, Слово и Сила наречется, сияние славы и Образ Отчи Ипостаси. И паки убо молим и, припадающе, лобызаем пречестную икону Премудрости Божия Матере и велегласно вопием: о Милосердая Владычице, спаси рабы Своя от насилия диаволя, от нахождения иноплеменных и междоусбныя брани, яко Ты еси всех благих Подательница и Покровительница притекающим к Тебе с верою и просящим велия милости.
Утверди ум мой благ и помышление, Боже Отче Вседержителю, ибо Заступницу мирови, Пренепорочную Невесту Деву, воспети дерзаю, Еяже девственную душу Церковь Твою Божественную нарекл еси, и, воплощения ради Слова Твоего, Софию, Премудрость Божию, именовал еси, и в Тоя имя царю Иустиниану церковь создати повелел еси, и пребожественному Кириллу философу во явлении девицу избранну, именем Софию, сйречь мудрость Божию, даровал еси. Зрак лица Ея огневиден вообразил еси, от Неяже изыде огнь Божества Твоего, сиречь Единородный Сын Твой, попаляя страсти наша тленныя, криле же Той, яко безплотным небесным силам, даровал еси, венец же царский на главу Ея возложил еси и в десницу Ея скипетр вдал еси, в шуйце же Ея недоведомая, сокровенная тайна, еяже непостижно ведати и Ангелом, тороцы во ушию Ея, житие ангельское и покоище Святаго Духа Твоего являющий, препоясание чресл Ея-старейшинство и святительство, нозе же имяше на камени, яко же на нем утверди Церковь Твою. Образ же Христа Твоего над главою Тоя, преклонение небесем и смотрения плотскаго таинство, являеши, якоже есть Сын прежде век Твоего Отча сияния, Тойже и под леты от Пренепорочныя Девы без Семене родися, по всему Тоя подобию приобщився. Сего ради вопием вси, яко Та есть воистинну Премудрость Божия, приятелище и сень Небесная и всех благих Подательница и Покровительница притекающим к Ней с верою и просящим велия милости.
Ирмос: Юноши три в Вавилоне, веление мучителево на буйство преложше, посреде пламене вопияху: благословен еси, Господи, Боже отец наших.
Рука избранных удержит Премудрость Божию, лучши бо есть сребра и злата, и на версех стен проповедуется, и во вратех сильных приседит, и, дерзающи, глаголет: радуйтеся со Мною, взыскающии Мене.
Славу Премудростию Божиею наследова, та бо есть долгота жития, и лета жизни дарует, и мир прилагает, вся благая исправляет, и путь жизни сохраняет нам.
Слава: Творяй правду наследит Премудрость Божию, Софию именованную, яко блага сосца ея паче вина и воня мира ея паче всех аромат. Взыщем Ту и вослед Ея течем, да суд и правду дарует нам.
И ныне: Всесвященное преставление Божественныя Твоея и Нетленныя Матере премирныя Вышних сил совокупи чины веселитеся с сущими на земли, Тебе поющими: благословен еси, Господи, Боже отец наших.
Ирмос: Всяческая, Владыко, Премудростию Твоею составил еси, земли же паки утвердил еси, якоже веси, дно, основанием водрузивый на водах безмерных. Тем вси вопием, воспевающе: благословите, дела Господня, непрестанно Господа.
Софие, Премудрость Божия именуемая, Самем Господем нареченная, царю Иустиниану в создании чуднаго храма Ангелом откровенная, темже вси вопием, воспевающе: благословите, вся дела Господня, непрестанно Господа.
Израилю повеле Господь в Силоме скинию поткнути и ту честно хранити, кольми паче честнейши одушевленная скиния, не Веселеилом сотворенная, но Самем Богом учиненная и София нареченная, в Нюже Сам Бог Слово вселися; благословите, вся дела Господня, непрестанно Господа.
Слава: Мысленный виноград храм Софии, Премудрости Божии, сиречь чрево Пресвятыя Богоматере, от негоже изыде Огнь Божественный, пожигаяй наша душетленныя страсти; благословите, вся дела Господня, непрестанно Господа.
И ныне: О, выше ума чудес Приснодевы же и Богоматере! Во гроб бо всельшися, показа рай. Емуже предстояще днесь, радующеся, поем и сице глаголем: благословите, вся дела Господня, непрестанно Господа.
Ирмос: Сокровенное Божие неизреченное в Тебе совершается явственное таинство, Дево Пречистая, ибо Бог из Тебе воплотися за милосердие. Темже Тя яко Богородицу величаем.
Егда недоумевашеся царь, в кое имя созиждет церковь Божию, тогда явися Ангел отроку, стрегущему орудия, во образе каженика, глаголя: кленутися во имя Софии, Премудрости Божий, в Еяже имя церковь сия зиждется.
Он же, уведев явление, радостен бе зело, и на совершение избранных церкве Божии тщательно касается, и сея ради вины венцем Премудрости облагается и во благочестии первый царь нарицается.
Слава: Нашего ради спасения Единородный Сын и Слово Божие храм Себе созда в пречестнем чреве Девы Марии и Ту Софию именова, Премудрость Божию, еже есть девственных душа, темже Тя яко Богородицу величаем.
И ныне: Приими от нас песнь исходную, Мати Живаго Бога, и светоносною Твоею и Божественною осени благодатию, христолюбивым людем мир, грехов оставление поющим и душам спасение подающи, темже Тя яко Богородицу величаем.
Непостижимая и Всепетая Премудросте Божия, Софие Преименитая, девственных душе, сиречь Единородный Сыне, Слове Божий, приими молебное сие пение от недостойных и скверных уст наших. Аще и писана суть: не красна песнь во устех грешничих, обаче же разбойник единем словом спасеся, мытарь воздыханием оправдася и хананеина дщерь матерним прошением исцелися, понеже Ты, Господи, Благ и Человеколюбив, грядущаго в мир просвещаеши, и грехи грешником отпущаеши, и разумом неразумных наполняеши, и буияго умудряеши, и жаждущия благих словес души учением Твоим, яко самаряныню водою живою, напаяеши, блудника целомудренна устроивши, разбойнику рай отверзавши, зане Ты еси всех благих Податель, и Вразумитель, и животу Хранитель, Христе Боже наш, и Тебе славу и хвалу, честь и благодарение и славословление возсылаем и поклонение творим со Безначальным Твоим Отцем, и со Пресвятым, и Благим, и Животворящим Твоим Духом, и со Пресвятою и Пренепорочною Твоею Материю, Владычицею нашею Богородицею и Приснодевою Мариею, ныне, и присно, и во веки веков. Аминь.
ВАЖНО: Все авторские матералы (статьи о воспитании, супружеских отношениях, чадородии), размещенные на этом сайте, отражают личную точку зрения автора и ни в коем случае не являются руководством к действию без благословения вашего духовника.
